Метки

, , ,

Акафист
Пресвятой Владычице Богородице
в честь иконы Ея «Избавительница»

4Тропарь, глас 4
Избавления приносящая всем/ от сердца Тебя призывающим,/ принеси избавление скорое и нам,/ в лютых бедах погибающим/ и в Тебе Единей избавление наше о Бозе полагающим.

Кондак 1
Возбрани врагом нашим озлобляти нас и от Господа нашего отлучити конечне и научи нас пети Тебе весело: Радуйся, от горя, бед и гибели спасающая нас, бедствующих Избавительнице.

Икос 1
Ангелов множество по Твоему, Мати наша, повелению ополчаются на избавление наше грозно. Ты же приими молитву сию: Радуйся, ангелов на спасение наше посылающая. Радуйся, Царице горних чинов, небесную их помощь нам дарующая. Радуйся, ангелом хранити нас повелевающая. Радуйся, воинством Ангельским врагов наших поражающая. Радуйся, от горя, бед и гибели спасающая нас, бедствующих Избавительнице.

Кондак 2
Видят бедствующие толикую и многую помощь сердечно Тя призывающим, наставляются тем пети Сыну Твоему: Аллилуиа.

Икос 2
Разумеют мнозии, яко мирови Тя дарова Сын Твой Избавительницей бедствующих. Тем же поем Ти сице: Радуйся, бедствующих Мати. Радуйся, страждущих утешение. Радуйся, болящих исцеление. Радуйся, безнадежных надеждо. Радуйся, от горя, бед и гибели спасающая нас, бедствующих Избавительнице.

Кондак 3
Сила Вышняго даровася Ти на помощь и спасение миру, и нас, в бедах погибающих, и кто Тобою не избавлен бысть, и кто не поет Сыну Твоему: Аллилуиа.

Икос 3
Имуще непостижимую любовь к роду человеческому, кии вздохи не прияла еси, кии слезы не отерла еси и кого не принудила призывати Тя вопиюще: Радуйся, бедствующих скорое услышание. Радуйся, погибающих быстрое спасение. Радуйся, печальных и скорбных утешение. Радуйся, плененных освобождение. Радуйся, от горя, бед и гибели спасающая нас, бедствующих Избавительнице.

Кондак 4
Буря несчастий налете на ны, спаси нас погибающих, Избавительнице наша, бурю погибельную на земле укротившая, показующая нам и приемлющаго нашу песнь: Аллилуиа.

Икос 4
Слыша человеческие роди всю Твою к христианам дивную любовь и Твое мощное избавление их от всяких находящих на ны лютых, научишеся петь Тебе: Радуйся, человеческаго рода от бед избавление. Радуйся, бурь житейских прекращение. Радуйся, уныния прогонительнице. Радуйся, радости по скорби нам подательнице. Радуйся, от горя, бед и гибели спасающая нас, бедствующих Избавительнице.

Кондак 5
Боготечней звезде подобящаяся, мрак и темноту в греховных сердцах наших разгоняющей, да во свете Твоея любви узрят Господа и воспоют Ему: Аллилуиа.

Икос 5
Видеша людии российские Твое нечаянное многоразличное от бед избавление, радостно поют Тебе сице: Радуйся, в бедах наша помощнице. Радуйся, скорбей наших отъятие. Радуйся, печалей наших отгнание. Радуйся, в скорбех наших утешение. Радуйся, от горя, бед и гибели спасающая нас, бедствующих Избавительнице.

Кондак 6
Проповедуют помощь Твою и любовь Твою, Мати, исцеленные, утешенные и обрадованные Тобою от бед и поют Твоему Высокодержавному Сыну: Аллилуиа.

Икос 6
Возсиял нам свет спасения во мгле погибели, окружившей нас, и наставил еси пети Тебе: Радуйся, мглу греха разгоняющая. Радуйся, мрак души моея просвещающая. Радуйся, тьму греховную потребляющая. Радуйся, светом радости души ободряющая. Радуйся, от горя, бед и гибели спасающая нас, бедствующих Избавительнице.

Кондак 7
Хотящим нам конечному отчаянию предатися, отовсюду бедам належащим, помыслихом о Тебе, Избавительнице, и ободрихомся и утешихомся, поюще Сыну Твоему: Аллилуиа.

Икос 7
Новую и нежданную показал нам милость Свою под державную руку Твою нас восприявши, и отсюда вопием Ти: Радуйся, Царице державная. Радуйся, и нас под Твою державу восприявшая. Радуйся, защиту Твою нам даровавшая. Радуйся, врагов наших поразившая. Радуйся, от горя, бед и гибели спасающая нас, бедствующих Избавительнице.

Кондак 8
Странное чудо на погибель обреченных, в нуждах томящихся, внезапу спасение и избавление получают от Тебе, Вселюбящей, поюще Богу: Аллилуиа.

Икос 8
Вси сущии во мраце скорбей, вси обуреваемые несчастий бурею, приидите к доброму пристанищу и нашему поможению, покрову Девы Избавительницы, вопиюще Ей: Радуйся, радостей источниче. Радуйся, печалей прогнание. Радуйся, бед уменьшение. Радуйся, всяческаго покоя подательнице. Радуйся, от горя, бед и гибели спасающая нас, бедствующих Избавительнице.

Кондак 9
Все существо человеческое хвалит Тя, все воспевает Тя, многоразличное избавление ему несущую, вместо печалей радость подающую, поющим: Аллилуиа.

Икос 9
Витии многоумнии обезумеша, видяще Твое быстрое, чудесное от бед страждущих избавление умолкоша, нам поющим Ти: Радуйся, чудесы мир удивившая. Радуйся, чудесы нас укрепившая. Радуйся, безбожие чудесами истребившая. Радуйся, врагов силою Божиею посрамившая. Радуйся, от горя, бед и гибели спасающая нас, бедствующих Избавительнице.

Кондак 10
Спасти хотя всяку душу человечу, всей любовию печешися о ней, дондеже не научиши ю пети Сыну Твоему: Аллилуиа.

Икос 10
Стеною мир христианский хранящи и всяку душу от врагов ограждающей, явися икона Твоя, Избавительнице, в мире православном чудесы прославися, Тебе людем Божиим воспевающим: Радуйся, наставнице наша. Радуйся, избавительнице наша. Радуйся, веселие наше. Радуйся, вечная радосте наша. Радуйся, от горя, бед и гибели спасающая нас, бедствующих Избавительнице.

Кондак 11
Пение непрестанное приносят Ти Тобою избавленнии и Тобою паки радость обретшии и Божественному Сыну Твоему поют радостно: Аллилуиа.

Икос 11
Светосияющим светильником лучезарным во мраце греха явися нам икона Твоя, Избавительнице, наставляющая нас пети Тебе: Радуйся, от глада нас избавляющая. Радуйся, вредоносящее вещество от растительного мира отгоняющая. Радуйся, посевы леса и все растущее от погибели спасающая. Радуйся, земледельцев скорбящих утешение и труда их благословение. Радуйся, от горя, бед и гибели спасающая нас, бедствующих Избавительнице.

Кондак 12
Благодать от иконы Твоея, Избавительнице, текущая, исцелений струи обильно подающая и сердца веселием оживляющая, побеждает всех волею пети Тебе, Мати, и Сыну Твоему и Богу: Аллилуиа.

Икос 12
Воспеваем исцеление, воспеваем наипаче воскресение Анастасия отрока и воспевающе поем: Радуйся, мертвых воскрешающая. Радуйся, умершая сердца оживляющая. Радуйся, от смерти и вечнаго огня изымающая. Радуйся, посмертное наше упование и защита. Радуйся, от горя, бед и гибели спасающая нас, бедствующих Избавительнице.

Кондак13
О Всепетая, Вселюбимая наша Мати, умилосердися ныне и помилуй, в лютых и безысходных сущих нас скорбех избавляющи, научи нас сердечно воспевати Богу прощающему: Аллилуиа.  (Читается трижды, после чего читается Икос 1, а потом Кондак 1).

Молитва
О Мати Божия, помощь и защита наша, егда попросим, буди Избавительницей нашей, на Тя бо уповаем и всегда вседушно Тебя призываем, умелосердися и помози, пожалей и избави, и приклони ухо Твое и наши скорбныя и слезныя молитвы приими, якоже хочеши, успокой и обрадуй нас, любящих Твоего Безначального Сына. Аминь.

Источник: Книга «Житие, пророчества, акафисты и каноны святым царственным мученикам». «Русь Самодержавная», 2005г.

Икона Божией Матери "Избавительница"

Икона Божией Матери «Избавительница»